黎到加拿大嘅第56日

一開始整呢個Blog嘅目的係想寫下Code，即然都寫Side Project，不如就順便記錄下自己人生。呢個Blog嘅CSS係會爛嘅，但係我懶得滯，唔理住，想執先執啦😆。

黎到呢度已經56日，都未搵到工。陸陸續續都in過幾份藍領工，但係聽到我得21歲就無回音，都有啲灰機。睇下要幾時先搵到第一份工。

有無話後悔過左黎呢，我同你講無，你都唔信啦。讀完CS畢業，響香港明明可以搵到份好工，做返自己鍾意嘅嘢唔好咩？點都好過響呢度失業啦。望住其他fd，前同事留響香港好好發展，睇到香港人工宜家升得好快，其實真係覺得自己過黎呢度嘅決定完全係Career Suicide。未過黎嘅時候已經知道呢度IT嘅就業市場壞壞地，成堆FAANG俾人laid off都未搵到工，你個FG仔點會搵到工，同自己講過要乜都做住先，但係過到黎呢邊，連M記超市藍領工都唔請，真係好灰。

上面嗰堆都係啲唸埋一二邊嘅唸法，我好清楚自己點解要過黎，我好清楚自己唔可以咁樣就返去。好彩響呢度識到啲新朋友，我同佢地講上面嘅唸法嘅時候，佢地都同我講唔好唔記得自己點解要過黎，勿忘初衷，涯完呢一年一齊都會變好，搵唔到工唔洗驚，寶物沉歸底，都感覺到呢班新朋友都係啲好有決心，好好嘅人，知道呢一年至少搵到啲可以交心嘅朋友。

講返啲開心嘢啦，早幾日本身唸住去個fd屋企坐下傾下計，點知佢個roommate唸住出去玩，叫埋佢，跟住我地就跟左出去。一開始唔知佢地講話去邊，整係聽到話去Ontario Place嗰邊，後尾出緊去嘅時候，發現原來係去Caribana Carnival，一個加勒比海嘅活動。我有個響U識嘅fd係中美mix香港，send左張相問係咪佢家鄉嘅服飾，佢又話唔係，跟住佢就講左啲故仔俾我聽，都幾誇張，不過呢啲有機會再分享。講返正題，入到去個Carnival真係好嘈，同埋周圍都係草味。聽到最大聲個下，feel到自己個身體共振緊，發現自己都少少毒撚格，唔鍾意啲咁嘈嘅地方。睇完個啲花車之後就走左去海邊，其實係湖邊先啱，不過是但啦。個海邊好鬼舒服，好有外國嘅味道，唔識講，香港通常有個圍欄擋住，但係呢度同我以前打機Watch Dogs，GTA個啲咁樣，個海邊係無圍欄擋住，個一刻真係好開心，好似進入打機嘅世界咁，但係唸返，其實係香港先係咁。

好啦，呢個Post就咁完啦，希望可以儘快寫下自己工作經歷啦。